Pagat e atyre që punojnë në shtet, nga viti i ardhshëm do të rriten aq sa do të shtrenjtohen çmimet. Për këtë qëllim, qeveria ka parashikuar një fond prej 4,3 miliardë lekësh.
Kjo shumë është sa 0,2% e Prodhimit të Brendshëm Bruto. Fondi do të përfshihet në buxhetin e vitit 2026 i cili pritet të depozitohet në Kuvend në fund të këtij muaji.
Eduart Gjokutaj, ekspert për ekonominë, u shpreh për A2: “Kjo do të thotë se të punësuarit nuk do të jenë më vulnerabël dhe në varësi të dëshirave të qeverisë për të rritur kur ata duan pagat”.
Erald Pashaj, ekspert i tregut të punës, thotë: “Pra, duhet parë inflacioni në vitin 2025, ai inflacion do të merret për bazë për indeksimin e pagave në sektorin publik në vitin 2026. Sigurisht që kjo është një shifër minimale dhe në parim fuqi blerëse mbetet po e njëjtë. Pra një punonjës i administratës publike, pas indeksimit merr të njëjtën gjë”.
Ndërkohë, pas objektivit për “pagë mesatare 900 euro”, qeveria duket se ka hequr dorë nga reforma të ngjashme. Për vitin 2026 nuk është parashikuar asnjë fond për politika të reja pagash.
“Tashmë do të veprohet me këtë politikë të re e cila do të amortizojë thjesht efeketet e inflacionit”, thekson Gjokutaj.
Ndërsa Erald Pashaj shprehet: “Në radhë të pare, pagat duhet të rriten çdo vit, pra jo të grumbullohet rritja dhe të bëhet në një vit të caktuar kur vjen situata ekonomike apo njerëzit largohen. Nuk duhen bërë ndryshimet kur jemi keq. Ndryshimet duhet të bëhen paraprakisht”.
Me gjithë retorikën e madhe për rritje pagash, një shqiptar pavarësisht nëse është rrogëtar në shtet apo privat, merr mesatarisht 3.6 euro në orë. Një orë punë në Shqipëri vlerësohet më pak se në çdo vend tjetër të Ballkanit Perëndimor, me përjashtim të Kosovës.
“Sepse ne priremi nga sensacioni dhe jo nga dëshira për të krijuar mirëqenie në popullatë”, thotë Gjokutaj.
“Paga jepet për sa paguhet një punë në treg. Nëse një punë në treg paguhet X, aq duhet të paguhen edhe punët e ngjashme me të. Kush pastaj ka performancë më të lartë, do të duhet të marrë diçka më shumë”, thekson Pashaj.
Ndërkohë, nga punëtorët e fabrikave e rrobaqepëset te shitëset, kamerierët apo punëtorët e ndërtimit, cilido i punësuar në Shqipëri nga fillimviti i ardhshëm do të paguhet me jo më pak se 50 mijë lekë. Paga minimale do të rritet me 10 mijë lekë. Premtimi i qeverisë gjatë fushatës elektorale për zgjedhjet e 11 majit është përfshirë në programin qeverisës të socialistëve për t’u zbatuar nga 1 janari 2026. (A2)
