Europianët janë ndër konsumatorët më të mëdhenj të alkoolit në botë, një zakon që lidhet me rritjen e sëmundjeve jo të transmetueshme.
Një raport i fundit i Organizatës Botërore të Shëndetësisë (OBSH) vë në dukje se konsumi i alkoolit po kontribuon gjithnjë e më shumë në rritjen e rasteve të kancerit kolorektal në Europë. Ekspertët theksojnë se rreth 39% e rasteve të këtij kanceri tek meshkujt lidhen me alkoolin.
Në vitin 2018, mbi 59,000 raste të kancerit kolorektal iu atribuuan konsumit të alkoolit. Ndërkohë, në vitin 2020, ky lloj kanceri u rendit si kanceri kryesor i shkaktuar nga alkooli, me mbi 60,000 raste të reja – më shumë se çdo lloj tjetër kanceri i lidhur me konsumimin e alkoolit.
Pavarësisht këtyre shifrave alarmante, alkooli mbetet lehtësisht i aksesueshëm, i promovuar gjerësisht dhe i normalizuar në jetën e përditshme.
Sipas të dhënave, të rriturit në Europë konsumojnë mesatarisht 9,2 litra alkool për person, duke e renditur rajonin si të parin në botë për nivelin më të lartë të konsumit. Meshkujt konsumojnë katër herë më shumë se femrat.
Në Shqipëri, të dhënat tregojnë një konsum mesatar prej 5,1 litrash për frymë. Konsumi tek meshkujt është 8,4 litra, ndërsa tek femrat vetëm 1,9 litra. Rreth 2,8% e shqiptarëve janë të varur nga alkooli, krahasuar me 5,9% në mesataren europiane.
