Obeziteti në popullatën shqiptare ka tendencë rritëse. E ndërsa në Europë 22,6% e popullatës janë obezë, në Shqipëri shifrat janë më të larta. Të dhënat zyrtare tregojnë se tek gratë obeziteti është në shifrat e 24,4%, ndërsa tek burrat është më e lartë.
Akoma më të larta janë shifrat kur bëhet fjalë për mbipeshën, pasi rezulton se gati 42% e burrave dhe 31% e grave kanë më shumë kile sesa norma mesatare.
Për mjekët, për këtë situatë kanë ndikuar shumë faktorë, mes të cilëve edhe mungesa e aktivitetit fizik dhe lëvizja me automjete.
“Obeziteti tashmë në botë, por edhe në Shqipëri, është kthyer në pandemi. Ka një rritje të personave obezë dhe atyre mbipeshë. Është një rritje e viteve të fundit që vjen për disa arsye: ndryshimi i stilit të jetesës, ulja e aktivitetit fizik, lëvizja me mjetet automobilistike gjatë pandemisë, ushqyerja e pashëndetshme”, tha Edlira Hoxha, mjeke endokrinologe.
Rritja e obezitetit po ndikon edhe në rritjen e sëmundshmërisë në popullatën shqiptare.
Personat që janë mbipeshë dhe obezë kanë risk për zhvillimin e disa sëmundjeve kronike siç është diabeti, hipertensioni arterial, yndyrnat, kolesteroli. Po ashtu, obeziteti është një nga shkaqet kryesore të rritjes së vdekshmërisë dhe aftësisë së kufizuar në popullatën europiane./Tv Klan
