Avokatja Adriana Kalaja, e cila ka shprehur publikisht interesin për të kandiduar në zgjedhjet e 9 nëntorit për Bashkinë e Tiranës, ka sulmuar sërish kundërshtarët e saj politikë.
Kësaj here në “rrethin e kuq” të Kalasë është aktori Florjan Binaj i cili jo më larg se mbrëmjen e së shtunës shpalli kandidaturën e tij dhe u kërkoi partive opozitarë që ta mbështesin.
Në llogarinë e saj në “Facebook”, avokatja ka postuar një foto të Binajt, i cili është në shoqërinë e disa personave, por në mesin e tyre është edhe Adriatik Lapaj si dhe Florian Haçkaj, i cili po ashtu dëshiron që të kandidojë për Bashkinë e Tiranës përballë socialistes, Ogerta Manastirliut.
“Ja kshu kshu. Përballë eskortave të Yuri Kim”, shkruan Kalaja, duke i akuzuar kështu për “dyfytrësi politike” dhe të “komanduar” nga ish-ambasadorja amerikane në Shqipëri.
Ky reagim i saj ka ardhur dhe pas mbështetjes publike që Lapaj i ofroi Florjan Binajt. Përmes një postimi në rrjetet sociale, ai u shpreh se kryesia e Lëvizjes “Shqipëria Bëhet”, vendosi që në garën për Bashkinë e Tiranës të mbështesin kandidatin e pavarur, Florjan Binajn.
“Dy ditë më parë propozuam që kandidatët për bashkitë në këto zgjedhje për shkak të situatës së jashtëzakonshme duhet të vinin nga radhët e qytetarëve të angazhuar dhe jo nga marrëveshjet e partive politike. Deklaruam se do të mbështesnim një prej kandidatëve të pavarur që do të shpallnin kandidimin në këto zgjedhje.
Duke shprehur vlerësimin për të gjithë ata që janë deklaruar, kryesia e Lëvizjes “Shqipëria Bëhet” ka vendosur që në Bashkinë Tiranë të mbështesë kandidatin e pavarur Florjan Binaj. Ky vendim bazohet te vullneti ynë i mirë dhe bindja që Shqipëria vlen mbi partinë”, shkruan Lapaj.
