Gazetarja dhe moderatorja Sonila Meço ka ndarë një reagim të fortë lidhur me situatën e rënduar të trafikut në Tiranë, duke e përshkruar kryeqytetin si “një trup pa qarkullim gjaku”.
Meço tregoi se për herë të parë ka humbur transmetimin e saj live, pasi i është dashur mbi një orë për të përshkuar vetëm një kilometër rrugë. “Humbja e një emisioni mund të duket problem personal, por ajo orë e çuar dëm nuk është vetëm imja — janë orë të vjedhura nga jeta e qytetarëve çdo ditë,” shkruan ajo.
Në reagimin e saj, gazetarja denoncon gjendjen kaotike të Tiranës, duke e cilësuar qytetin si të pamenaxhueshëm për shkak të mungesës së planifikimit urban, ndërtimeve të pakontrolluara dhe projekteve pa koordinim. “Çdo kantier, çdo devijim, çdo vizitë zyrtare, çdo ‘projekt estetik’ kthehet në barrikadë,” thekson ajo.
Sipas Meços, trafiku i përditshëm po shkatërron cilësinë e jetës së qytetarëve: “Në çdo bllokim digjet karburant, qelbet ajri që thithim, rritet ndotja, bie cilësia e frymëmarrjes. Tirana po e helmon veten në çdo frenim me 300 mijë motorë të ndezur në vendnumëro.”
Ajo kritikon edhe vendimin për ndalimin e monopatinave, duke thënë se në vend që të krijohen zgjidhje, po ndalohen mjetet që ndihmojnë qarkullimin. “Ndalohen zgjidhjet, jo problemet,” shkruan ajo me ironi.
Në fund, Meço ngre pyetje të forta për fatin e Tiranës dhe banorëve të saj: “Çfarë i bënë Tiranës sonë? Si e kthyen në një qytet përbindësh që ha kohën, durimin, shëndetin dhe dinjitetin e banorëve të vet?”
Ajo e mbyll reagimin me një reflektim të dhimbshëm: “Ne që jetojmë këtu po tërhiqemi zvarrë në laboratorin e lodhjes kronike — në qytetin që ka humbur qarkullimin e ideve, ajrit, pushtetit dhe njerëzve.”
