Një orë pas fillimit të takimit mes presidentit të Shteteve të Bashkuara, Donald Trump, dhe presidentit rus, Vladimir Putin, mediat ndërkombëtare raportojnë se bisedimet vazhdojnë të zhvillohen me delegacionet përkatëse, pa asnjë shenjë të ndërprerjes së papritur që presidenti amerikan kishte përmendur para takimit.
Në fillim të kësaj jave, Trump kishte deklaruar se do të mund ta kuptonte brenda pak minutash nëse Putini ishte vërtet i interesuar për paqen, duke shtuar se nëse bisedimet nuk do të shkonin siç duhet, ai do të ishte i gatshëm të largohej nga takimi. “Mund të largohem dhe të them, ‘fat të mbarë’, dhe ky do të jetë fundi. Mund të them se kjo nuk do të zgjidhet,” kishte theksuar ai para samitit.
Nga informacionet e fundit, asnjë shenjë nuk është dhënë që Trump ka ndërprerë bisedimet ose ka treguar ndonjë hap të tillë. Lajmet nga disa agjenci ndërkombëtare, si Reuters dhe BBC, tregojnë se takimi mes dy liderëve është zhvilluar në një atmosferë të tensionuar, por pa ngjarje të papritura që mund të ndryshonin kursin e negociatave.
Deri tani, detaje konkrete mbi përmbajtjen e diskutimeve ende nuk janë bërë publike, por shumë media ndërkombëtare raportojnë se pritet të ketë një konferencë për shtyp pas përfundimit të takimit, ku mund të bëhen publike më shumë informacion mbi arritjet e mundshme ose pengesat në bisedime.
Mediat gjithashtu spekulojnë se një temë e mundshme që mund të diskutohet në takimin e Trump dhe Putin është situata e tensionuar ndërkombëtare dhe mundësia e një reduktimi të sanksioneve të SHBA-së ndaj Rusisë, si dhe disa çështje të tjera lidhur me politikën e jashtme dhe sigurinë.
