Kupa e Mbretit 2026 ka hyrë në fazën përfundimtare dhe tashmë janë përcaktuar dy skuadrat që do të luftojnë për trofeun në finalen e madhe. Këtë herë, në aktin final nuk do të jenë as Barcelona dhe as Real Madridi, ndërsa finalistët rezultojnë një surprizë e bukur për shumë tifozë: Real Sociedad dhe Atlético Madrid.
Real Sociedad u bë finalistja e dytë pas një tjetër paraqitjeje shumë të fortë në derbin bask ndaj Athletic Bilbaos. Pasi kishte fituar ndeshjen e parë 1-0, skuadra nga San Sebastiáni e përsëriti të njëjtin rezultat edhe në ndeshjen e kthimit, duke mos i dhënë asnjë mundësi rivalit. Me rezultat të përgjithshëm 2-0, Real Sociedad siguroi me meritë biletën për në finale.
Një ditë më herët, gjysmëfinalja tjetër dhuroi emocione të mëdha. Atlético Madrid arriti të kualifikohej në finale pavarësisht humbjes 0-3 ndaj Barcelonës në ndeshjen e kthimit. Katalanasit iu afruan një përmbysjeje të madhe, por avantazhi i krijuar nga skuadra e Diego Simeones në ndeshjen e parë rezultoi vendimtar. Në total, Atlético kaloi më tej me rezultatin e përgjithshëm 4-3, duke i mbajtur tifozët në ankth deri në sekondat e fundit.
Në këtë mënyrë, finalja e Copa del Rey do të vendosë përballë Real Sociedad dhe Atlético Madrid, në një duel që pritet të jetë shumë i luftuar. Ndeshja vendimtare për trofeun prestigjioz është planifikuar të luhet më 25 prill.
