Prilli i këtij viti është renditur ndër muajt më të nxehtë të regjistruar ndonjëherë në planet, duke u klasifikuar si prilli i tretë më i ngrohtë në histori. Temperatura mesatare globale ka qenë rreth 1.43°C mbi nivelet para-industriale.
Sipas Shërbimit Evropian për Ndryshimet Klimatike, edhe temperaturat e sipërfaqes së oqeaneve kanë arritur nivele shumë të larta, duke qenë ndër më të lartat e regjistruara për muajin prill. Shkencëtarët thonë se kjo ngrohje e vazhdueshme e deteve po krijon kushte për përforcimin e fenomenit klimatik “El Nino”.
Ky fenomen lidhet me ngrohjen e pazakontë të ujërave në Paqësor dhe mund të ndikojë ndjeshëm në klimën globale, duke sjellë thatësira, përmbytje dhe valë të të nxehtit në rajone të ndryshme të botës.
Ekspertët paralajmërojnë se një “El Nino” më i fortë se zakonisht mund të rrisë më tej temperaturat globale gjatë muajve të ardhshëm, duke shtuar intensitetin e motit ekstrem.
Ndërkohë, në disa rajone të botës tashmë janë raportuar përmbytje të forta, thatësira dhe ndryshime të ndjeshme klimatike. Edhe në Evropë, përfshirë Spanjën dhe pjesë të Evropës Lindore, janë regjistruar kontraste të forta mes të nxehtit ekstrem dhe temperaturave më të ulëta se normalja.
Shkencëtarët theksojnë se këto të dhëna janë një tjetër sinjal i përshpejtimit të ndryshimeve klimatike globale dhe rritjes së shpeshtësisë së fenomeneve ekstreme të motit.
