Sipas “Daily Mail”, rrugëtimi i grupit kriminal shqiptar Hellbanianz filloi në Gascoigne Estate, Barking, ku shpërndanin kokainë dhe rekrutonin të rinj shqiptarë. Pas shembjes së ndërtesave që shërbenin si bazë, udhëheqësi Ervin Selita (“Vinz”) dhe disa bashkëpunëtorë u zhvendosën në Dubai, larg juridiksionit britanik.
Selita, i liruar nga burgu në Shqipëri në korrik 2023 pas një dënimi për tentativë vrasjeje, shfaqet tani në rrjetet sociale duke promovuar një imazh luksi – makina “Rolls Royce”, festa në shkretëtirë dhe etiketa si “#DubaiSettings”. Ky “marketing kriminal” në TikTok vazhdon të tërheqë të rinj shqiptarë, sidomos nga veriu i vendit.
Hellbanianz nisi si grup muzikor në vitin 2000, por shpejt u kthye në organizatë kriminale me moton “We are God of the Streets”. Grupi është përfshirë në përleshje të armatosura dhe krime të rënda; disa nga figurat kryesore janë në burg, por ndikimi i tyre në rrugët e Barking mbetet i pranishëm.
Dubai, i njohur për mundësitë e investimeve të parave të pista dhe distancën nga ligji britanik, është kthyer në strehë për trafikantët ndërkombëtarë. Aty, sipas burimeve, liderët e krimit jo vetëm jetojnë të qetë, por edhe ndërtojnë rrjete të reja për trafikun global të drogës.
