Një emigrant indian që punonte dikur për vetëm 6 dollarë në orë në SHBA, sot fiton 2 milionë dollarë në vit falë përkushtimit dhe shpirtit sipërmarrës.
Historia e Money Singh, e publikuar nga “CNBC”, po bëhet një shembull i fortë i suksesit që vjen nga puna e ndershme dhe këmbëngulja.
Money Singh mbërriti në San Francisko në vitin 2006, në moshën 19-vjeçare, duke lënë pas Indinë dhe familjen e tij në kërkim të një jete më të mirë.
Në fillim punoi në farmaci e më pas si shofer taksie, duke fituar vetëm gjashtë dollarë për orë. Ai rrëfen se në ato vite ndiente shpesh dëshirën për t’u kthyer, por vështirësitë e nxitën të mësonte dhe të ndërtonte diçka vetë.
Me kalimin e kohës, Singh nisi të blejë vetë makinat që drejtonte dhe krijoi rrjetin e tij të transportit. Ky ishte hapi i parë drejt themelimit të kompanisë Driver’s Network, një platformë që lidh shoferët e pavarur me klientët përmes teknologjisë dhe reklamave.
Në vitin 2019, ai u zgjerua edhe në një fushë krejt tjetër: biznesin e salloneve të bukurisë. Duke marrë frymëzim nga nëna e tij, Singh hapi sallonin Dandies Barbershop & Beard Stylist në Mountain View, Kaliforni. Sot ai zotëron tre degë të këtij rrjeti dhe punëson rreth 25 persona.
Të dy bizneset e tij kanë arritur fitime mbresëlënëse:
Driver’s Network gjeneron mbi 1,18 milionë dollarë në vit
Dandies Barbershop arrin rreth 1,07 milionë dollarë në shitje vjetore
Në total, Singh fiton më shumë se 2 milionë dollarë në vit dhe punon deri në 16 orë në ditë për të ruajtur suksesin.
Ai thotë se sekreti i arritjeve të tij është “disiplina, durimi dhe dëshira për të mësuar çdo ditë diçka të re.”
Sot, ai po përgatitet të lançojë aplikacionin Barber’s Network, që do t’u mundësojë klientëve të rezervojnë shërbime në sallonet e flokëve përmes telefonit – një hap tjetër që e kthen nga një ish-shofer taksie në një sipërmarrës me vizion global.
