Duhej të kalonin 70 vite, që Newcastle më në fund të fitonte një trofe madhor në Angli. “Qymyrxhinjtë” kanë mposhtur 2-1 Liverpool-in në “Wembley” dhe kanë fituar për herë të parë trofeun e EFL Cup apo e njohur ndryshe Carabao Cup.
Hera e fundit që Newcastle fitonte një trofe në Angli, ka qenë në vitin 1955, kur mposhtnin 3-2 Manchester City në finalen e FA Cup. Përsa i përket finales së sotme, “Qymyrxhinjtë” dominuan nga fillimi në fund të ndeshjes dhe morën një fitore mëse të merituar përballë një Liverpool-i shumë të dobët, ndoshta ndeshja e tyre më e dobët për këtë vit.
Goli i parë i takimit erdhi në fundin e pjesës së parë, ishte Dan Burn që shënoi me kokë pas topit të ardhur nga goditja e këndit dhe ishte pikërisht qendërmbrojtësi i Newcastle që kërceu më shumë se të tjerët dhe “shkundi” rrjetën, i lënë në harresë edhe nga mbrojtësit e Liverpool.
Newcastle dyfishoi shifrat në fillim të pjesës së dytë, falë të zakonshmit Alexander Isak. Liverpool do të ngushtonte shifrat me golin e Federico Chiesa në minutën e 95-të, i cili shënoi pas asistit të Harvey Elliott. U desh ndërhyrja e VAR-it për të konfirmuar golin e italianit.
Newcastle mposht përfundimisht 2-1 Liverpool dhe fiton trofeun e EFL Cup. Festë e madhe në “Wembley” nga tifozët e shumtë të Newcastle dhe nga stafi bashkë me lojtarët dhe trajnerin Eddie Howe.
