Në kuadër të Ditës Ndërkombëtare të Gruas, Kryeministri Edi Rama ka zhvilluar një takim me gratë dhe vajzat nga i gjithë vendi për të festuar 8 Marsin. Gjatë fjalës së tij, Rama ka theksuar se gratë janë të përfshira në të gjitha nivelet e vendimmarrjes, një arritje që ai e konsideron si meritë të Partisë Socialiste.
Rama theksoi se PS ka një mbështetje të fortë nga gratë, duke shtuar se nëse vetëm gratë do të votonin në Shqipëri, Partia Socialiste do të fitonte 90 mandate. “Besoj shumë në radhë të parë tek cilësia dhe mençuria e grave, nuk është e rastit dhe unë jam krenar për këtë. Nuk është e rastit që PS e votojnë më shumë gra se sa burrat. Nëse do votonin vetëm gratë në Shqipëri, ne do merrnim 90 deputetë. Këto janë shifrat“, tha ai.
Kryeministri po ashtu shprehu vlerësimin e tij për rolin e grave në shoqëri dhe theksoi se gratë janë përtej një vote, pasi “është më shumë se sa një votë, është një vendim.” Ai shtoi se gratë janë nëna, motra dhe bija, që kanë brenda vetes kujdesin për të ardhmen dhe se janë ato që ndihmojnë në ndërtimin e fatit. Rama i konsideroi gratë si forca që kontribuojnë për një të ardhme më të mirë dhe të qëndrueshme.
Kryeministri përfundoi duke theksuar se gratë, në krahasim me burrat, nuk janë tifozë, por janë ato që kujdesen dhe ndihmojnë në zhvillimin dhe përparimin e shoqërisë.
“Gratë nënat nuk janë tifoze, burrat janë tifozë, janë skandalozë. Gratë janë nëna, motra, bija që kanë të lindur brenda vetes kujdesin për atë që vjen nesër. Gratë e ndërtojnë fatin“, tha Rama.
