Sfida e Champions League mes Paris Saint-Germain dhe Barcelonës rrezikoi të ndryshonte datë për shkak të shqetësimeve serioze për sigurinë në kryeqytetin francez.
Një sindikatë e policisë franceze kërkoi zyrtarisht shtyrjen e ndeshjes, duke paralajmëruar për rrezikun e trazirave në rrugët e Parisit dhe për ngarkesën e madhe që pritet të përballojnë forcat e rendit.
Megjithatë, autoritetet franceze e kanë refuzuar kërkesën dhe kanë konfirmuar se përballja do të zhvillohet sipas programit.
Ministria e Brendshme dhe prefektura e policisë së Parisit kanë garantuar se janë të gatshme të mobilizojnë forca të konsiderueshme për të siguruar mbarëvajtjen e takimit në “Parc des Princes”.
Rreth stadiumit pritet të vendosen njësi shtesë të xhandarmërisë, forca për kontrollin e turmave dhe polici e montuar, ndërsa tifozët do të kalojnë në disa nivele kontrolli përpara hyrjes në impiant.
Përballjet mes PSG-së dhe Barcelonës janë shndërruar ndër vite në disa nga sfidat më të ngarkuara emocionalisht në futbollin europian, çka ka shtuar edhe më shumë vëmendjen rreth masave të sigurisë për këtë takim.
Pavarësisht kërkesës së policisë, ndeshja nuk do të shtyhet dhe pritet të luhet sipas kalendarit të Champions League.
