Ajola Xoxa, bashkëshortja e kryebashkiakut Erion Veliaj ditën e sotme është paraqitur në SPAK në zbatim të masës së sigurisë “detyrim paraqitje”.
Xoxa duhet të paraqitet para oficerëve të policisë gjyqësore të premten e parë dhe të tretë të çdo muaji në orën 11:00.
Erion Veliaj ndodhet në burg pasi u arrestua më 10 shkurt me urdhër të SPAK. Ndaj Xoxës u vendos fillimisht masa e sigurisë “arrest shtëpie”, por më 12 shkurt, gjatë seancës së rivlerësimit të masës, GJKKO vendosi ndaj saj masën “Detyrim paraqitje”. Gjithashtu i ndalohet largimi jashtë Shqipërisë.
Çifti Xoxa-Veliaj dyshohet se ka kryer korrupsion dhe pastrim parash në bashkëpunim 9 herë, ku Veliaj si kryetar i bashkisë vuri fondet publike në dispozicion të gruas e të familjravë të saj për të përfituar vetë. Ajola Xoxa dyshohet se ka fshehur origjinën e parave, prandaj SPAK e dyshon edhe se ka kryer mosdeklarim të ardhurash.
Sipas prokurorëve që vunë në sitë pasuritë e dyshes Veliaj- Xoxa, kjo e fundit ka blerë 860 mijë euro rroba e bizhuteri online duke përdorur karta krediti të personave të tretë. Mes tyre edhe atë të të ëmës, Valbona Xoxa.
