Fiorentina i ka dhënë një tjetër kthesë garës për titull në Serie A, pasi ndali Interin me barazimin 1-1 në “Franchi”. Zikaltrit kaluan në avantazh që në sekondat e para me Pio Espositon, por skuadra vendase reagoi në fund të ndeshjes dhe mori një pikë shumë të vlefshme falë golit të Ndour.
Interi e nisi sfidën në mënyrën më të mirë të mundshme. Barella përfitoi nga një top i lirë në të djathtë dhe shërbeu për Pio Espositon, i cili shënoi pas vetëm 39 sekondash. Ishte goli i gjashtë i sulmuesit në Serie A dhe një nisje perfekte për skuadrën e Chivut, që dukej se kishte nën kontroll ndeshjen. Megjithatë, me kalimin e minutave, Fiorentina filloi të rritej dhe të krijonte gjithnjë e më shumë rrezik.
Skuadra vjollcë arriti ta gjejë barazimin 13 minuta para fundit. Gjithçka nisi nga një aksion i ndërtuar në të majtë, ku Gudmundsson provoi me një goditje nga jashtë zone, Sommer nuk arriti ta largonte si duhet topin dhe Ndour u gjend në vendin e duhur për ta shtyrë në rrjetë. Ishte goli i dytë i tij në kampionat dhe momenti që ringjalli jo vetëm Fiorentinën, por edhe garën në krye të renditjes.
Interi provoi ta fitonte ndeshjen me presion të lartë dhe agresivitet, por kjo strategji funksionoi më shumë në pjesën e parë. Fiorentina, me kundërsulme dhe dalje të shpejta nga mbrojtja, arriti të anashkalonte presionin zikaltër dhe të krijonte disa raste të pastra. Kean, Gudmundsson, Fagioli dhe vetë Ndour vunë në vështirësi mbrojtjen e Interit, ndërsa në fund vendasit ishin madje shumë pranë përmbysjes së plotë.
Problemet për Interin u panë sidomos në repartin defensiv. Ndryshimet e bëra në pushim nuk sollën sigurinë e duhur, ndërsa disa lojtarë si Dumfries dhe Akanji nuk dhanë paraqitjen e pritur. Edhe pse zikaltërit patën shanset e tyre, përfshirë një mundësi të mirë të Espositos në fund, De Gea u tregua i vëmendshëm dhe ruajti barazimin për Fiorentinën.
Në fund, kjo ishte një pikë që i shërben shumë më tepër Fiorentinës, por që mund të peshojë rëndë për Interin në javët e fundit të sezonit. Skuadra zikaltër ka lëshuar sërish terren në krye dhe diferenca me rivalët është ngushtuar ndjeshëm, ndërsa gara për Scudetton mbetet plotësisht e hapur.
