Policia e Fierit ka arrestuar dy persona, pasi dyshohet se kanë ndezur zjarr në fshatrat Eskaj dhe Hasturkas.
Gjithashtu janë proceduar penalisht dy shtetas të tjerë për zjarre të shkaktuara nga pakujdesia, në Varibop dhe Mallakastër.
Policia njofton se në fshatin Eskaj të Lushnjës, u arrestua shtetasi K. B., 60 vjeç, i cili u konstatua duke ndezur qëllimisht zjarr në tokën e marrë me qira prej tij;
Ndërsa nëëzonën e mbrojtur Divjakë-Karavasta, në fshatin Hasturkas, u arrestua shtetasi E. S., 25 vjeç, banues në Fier, pasi dyshohet si autor i zjarrvënies në grykëderdhjen e lumit Seman, ku zjarri ka përfshirë bimësi dhe një sipërfaqe të konsiderueshme të pyllëzuar, pjesë e zonave të mbrojtura.
Gjithashtu, u proceduan penalisht, për shkak të moshës, dy shtetas, përkatësisht 71 dhe 77 vjeç, pasi dyshohet se kanë ndezur zjarre në tokat e tyre, në fshatin Varibop, Fier, dhe në fshatin Çërrilë, Mallakastër. Si pasojë e erës së fortë, zjarret kanë dalë jashtë kontrollit, duke përfshirë sipërfaqe me bimësi.
Ndaj tyre rëndon akuza “Shkatërrimi i pronës me zjarr”.
