Jorge Messi, babai i yllit argjentinas Lionel Messi, ka ndërruar jetë në moshën 68-vjeçare, raportojnë disa media argjentinase, ndërsa lajmi është publikuar edhe nga media sportive Goal.com.
Jorge Messi prej disa kohësh vuante nga probleme shëndetësore dhe ndodhej nën kujdesin e mjekëve. Gjendja e tij ishte bërë publike në qershor, pasi Lionel Messi u shfaq i përlotur pas golit të shënuar me Argjentinën në ndeshjen ndaj Algjerisë në Kupën e Botës.
Pas ndeshjes, Messi u pyet për emocionet e tij dhe deklaroi se ato nuk kishin lidhje me futbollin.
“Pse po qaja? Nuk kishte absolutisht asnjë lidhje me futbollin. Kam kaluar disa ditë të vështira”, kishte thënë ai.
Deklarata e kapitenit të Argjentinës nxiti menjëherë spekulime në mediat ndërkombëtare, të cilat e lidhën gjendjen e tij emocionale me problemet shëndetësore të babait.
Në atë kohë, familja Messi reagoi përmes një deklarate, duke konfirmuar se Jorge Messi po përballej me probleme shëndetësore dhe po merrte trajtim mjekësor.
“Familja Messi dëshiron të informojë se Jorge Messi aktualisht po përballet me probleme shëndetësore. Ai ndodhet nën mbikëqyrje mjekësore dhe po rikuperohet mirë”, thuhej në deklaratë.
Në fund të korrikut, Lionel Messi mungoi në ndeshjen “All-Star” të MLS-së, ndërsa besohej se kishte udhëtuar për të qëndruar pranë babait të tij. Pak ditë më vonë, ai u rikthye në fushë me Inter Miami.
Jorge Messi ka qenë një figurë kyçe në karrierën e djalit të tij. Ai e ka menaxhuar Lionel Messin që në vitet e para të karrierës dhe ka qenë pranë tij gjatë rrugëtimit nga Rosario drejt majës së futbollit botëror.
