Presidenti Bajram Begaj ka reaguar pas ndarjes nga jeta të Kryepeshkopit të Shqipërisë, Anastas Janullatos, i cili ka ndërruar jetë mëngjesin e sotëm në Spitalin “Evangelismos” të Athinës.
Në një postim në rrjetet sociale, kreu i Shtetit shprehu se Shqipëria humbi sot një udhëheqës shpirtëror dhe një figurë të shquar të Kishës Ortodokse Autoqefale. Presidenti vlerësoi udhëheqjen e Kryepeshkopit Janullatos, duke theksuar mençurinë, përkushtimin dhe dashurinë e tij për njerëzit, duke kontribuar në forcimin e Kishës dhe krijimin e një rruge të re për besimin ortodoks shqiptar, veçanërisht pas periudhës së vështirë që ka kaluar. Ai e cilësoi Kryepeshkopin një shembull të palodhur të përkushtimit shpirtëror dhe një udhërrëfyes për të gjithë besimtarët që e ndoqën.
Presidenti Begaj shprehu gjithashtu ngushëllimet për Kishën Ortodokse Autoqefale dhe për të gjithë besimtarët, që humbën atin dhe udhëheqësin e tyre të dashur dhe të nderuar.
Postimi i plotë:
Shqipëria humbi sot Fortlumturinë e tij, Kryepiskopin e Tiranës, Durrësit dhe të gjithë Shqipërisë, Prof. Dr. Anastasin, udhëheqësin shpirtëror dhe figurën e shquar të Kishës Ortodokse Autoqefale të Shqipërisë.
Gjatë udhëheqjes së tij, Fortlumturia e tij ka udhëhequr Kishën me mençuri, përkushtim dhe dashuri për njerëzit, duke kontribuar në forcimin e saj dhe në krijimin e një rruge të re për besimin ortodoks shqiptar, veçanërisht pas periudhës së vështirë të kaluar. Ai ishte një shembull i palodhur i përkushtimit shpirtëror dhe një udhërrëfyes për të gjithë ata që e ndoqën.
Në këtë moment të dhimbshëm, shprehim ngushëllimet tona më të thella për Kishën dhe për gjithë besimtarët, që humbën atin dhe kryebariun e tyre, një udhëheqës të dashur dhe të nderuar. Trashëgimia e Fortlumturisë së tij do të mbetet gjithmonë e gjallë në zemrat e atyre që e nderuan dhe e donin.
Lutemi që Zoti t’i dhurojë prehjen në tendat e të drejtëve dhe qoftë kujtimi i tij i përjetshëm!
