Optimizmi gati në eufori për një vit edhe më të mirë, me pritshmëritë për të mirëpritur 14 milionë turistë po nxit tregun e qiradhënies së makinave.
Të dhënat nga Drejtoria e Transportit rrugor tregojnë se vetëm në tre muajt e parë të vitit u sollën nga jashtë mbi 22 mijë automjete, niveli më i lartë i shënuar ndonjëherë.
“Kërkesat për këtë vit krahasuar me vitin e kaluar janë 3 herë më të larta. Janë statistika që i gjenerojë nga sistemet tona. Sigurisht që çmimet ndryshojnë në varësi të prenotimit dhe kohës, ku ata që kanë aplikuar më herët kanë përfituar nga çmimet më të lira. Çmimi mesatar është 40-45 euro që përfshin TVSH, asistencën teknike”, shpjegon për A2 CNN Andi Allushi, sipërmarrës në qiradhënie makinash.
Megjithatë preferenca e markave nuk ka ndryshuar, “Volkswagen”, ndjekur nga Mercedes Benz, Audi, Hyundai, Ford, Fiat e BMW.
“Shqiptarët marrin makina me qira por preferojnë çmimin më të lirë dhe jo shërbimin më të mirë. Të huajt preferojnë makina me çmim mesatar, por me fuqi motorike të ulët për mos harxhuar shumë”, thotë Allushi.
Me sezonin masiv turistik në kulm, kompanitë e qiradhënies së makinave po përballen me një problem… atë të prenotimit të çdo automjeti të mundshëm. “Për gushtin nuk kemi asnjë mjet të lirë. Në gjuhën tonë kemi bërë “stop sale”. Duhet të shtojmë flotën”, thotë Allushi.
Të dhënat tregojnë se 87 për qind e mjeteve që u regjistruan për herë të parë në janar–mars ishin me naftë, benzinë apo gaz, çmimi i të cilave u shtrenjtua ndjeshëm në mars./Marrë nga A2 CNN
