Ditën e djeshme, grupi hetimor i ka marrë dëshminë 14-vjeçarit të plagosur që ndodhet në spitalin e Traumës, Luisit.
Dëshmia është marrë në praninë e psikologes dhe familjarëve.
I plagosuri, shok i Martin Canit që mbeti i vrarë me thikë më 18 nëntor, ka deklaruar se të dy janë goditur me thikë nga dy bashkëmoshatarë, pra autorit të arrestuar Mario Përlleshaj edhe nga një person tjetër shok i autorit, me iniciale K.B.
Sipas të plagosurit, autori ka pasur thikë më të madhe, ndërsa personi tjetër thikë më të vogël dhe të dy i kanë goditur.
Të njëjtën dëshmi ka dhënë edhe babai i të plagosurit këtë të dielë pasi është pyetur sërish nga policia pas deklaratave të tij në media.
Kjo ka bërë që grupi hetimor të vijojë sekuestrimin dhe kqyrjen e kamerave të sigurisë në të gjithë zonën nga e para.
Tashmë po hetohet edhe pista që mund të kenë qenë dy persona.
Nga kqyrja e parë e kamerave është konfirmuar se autori i arrestuar dhe dy bashkëmoshatarë të tjerë largohen me vrap nga vendi i ngjarjes deri te ish-ATSH aty ku u gjet edhe çanta dhe një thikë.
Deri aty kanë ikur në këmbë të tre minorenët ku më pas dyshohet se një person i ka marrë me makinë.
Hetuesit janë rikthyer sërish aty për të sekuestruar kamerat.
Po ashtu thika që u gjet nga policia nuk është e njëjtë me atë që ka publikuar autori i arrestuar në rrjete sociale.
Ky fakt ka ngritur dyshimet te policia se mund të kenë qenë dy autorë të cilët dyshohet se kanë qëlluar me dy thika të ndryshme.
Edhe telefonat celularë të autorit të arrestuar dhe dy shokëve të tij ende nuk janë gjetur nga policia.
Dëshmitë e reja dhe dyshimet nga hetuesit i kanë dhënë një tjetër rrjedhë hetimeve të policisë, në lidhje me ngjarjen e rëndë në shkollën ‘Fan Noli’ në Tiranë.
Tashmë e gjithë çështja do të nisë nga fillimi.
Do të rikqyren të gjitha pamjet e kamerave të sigurisë, si dhe do të rimerren në pyetje i gjithë stafi i shkollës Fan Noli, të gjithë dëshmitarët e përfshirë që kanë qenë në ngjarje por dhe minorenët e përfshirë në konflikt.
