Ministria e Punëve të Jashtme të Kosovës ka reaguar pas një incidenti të ndodhur në Lubjanë, ku disa qytetarë shqiptarë – përfshirë edhe shtetas të Shqipërisë – raportuan vjedhjen e targave të automjeteve të tyre pas ndeshjes mes Kosovës dhe Sllovenisë.
Sipas njoftimit zyrtar, Ambasada e Kosovës në Slloveni ka marrë thirrje nga qytetarë që pas daljes nga stadiumi “Stožice” kanë konstatuar se targat e automjeteve u ishin hequr.
Ambasada ka theksuar se dyshohet për një veprim të qëllimshëm dhe ka rekomanduar që automjetet të mos lëvizen pa njoftuar Policinë sllovene dhe pa marrë fillimisht një raport zyrtar.
Përfaqësues të Ambasadës janë vënë në kontakt me disa nga të prekurit, duke bashkërenduar veprimet me autoritetet lokale për të siguruar që ndihma të jepet sa më shpejt. Qytetarët e Kosovës janë inkurajuar të raportojnë çdo rast në Policinë sllovene për të marrë asistencën dhe udhëzimet e nevojshme.
Incidentet janë raportuar kryesisht në zonën përreth stadiumit, ku ishin parkuar një pjesë e tifozëve kosovarë. Ndërkohë, media kosovare “KOHA” ka kontaktuar Policinë sllovene për detaje shtesë dhe është në pritje të përgjigjes.
Ndeshja e fituar nga Kosova ka sjellë një atmosferë të tensionuar në stadium, me mediat sllovene që kanë theksuar praninë e madhe të tifozëve shqiptarë.
Reagime të ndryshme janë shfaqur edhe në mediat serbe, të cilat kanë tentuar të minimizojnë suksesin e Kosovës, pavarësisht se ekipi kosovar është afruar me mundësinë e kualifikimit në Kupën e Botës.
