Reshjet e dendura të shiut kanë shkaktuar përmbytje në territorin e Malësisë e Madhe, ku situata më shqetësuese paraqitet në lagjet Kaldrun dhe Kamicë.
Institucionet vendore, në bashkëpunim me strukturat e emergjencave civile, bëjnë me dije se janë të angazhuara në terren dhe ndodhen në gatishmëri të plotë për të përballuar çdo përkeqësim të situatës.
Në Bashkinë Shkodër janë regjistruar reshje shiu me intensitet të lartë, ndërsa në Bashkinë Vau i Dejës aktualisht nuk raportohen reshje. Në Bashkinë Malësi e Madhe, gjatë natës janë shënuar reshje të forta, të cilat kanë sjellë prani uji në rrugët e qytetit të Koplikut.
Në fshatin Kamicë, Njësia Administrative Qendër, si pasojë e prurjeve nga Përroi i Thatë, janë konstatuar dëmtime në rrugën që kalon mbi të, duke shkaktuar vështirësi të përkohshme në qarkullim dhe në lidhjen Kamicë–Flakë. Strukturat vendore po ndjekin nga afër situatën.
Ndërkohë, në bashkitë Fushë-Arrëz dhe Pukë reshjet e shiut vijojnë, të shoqëruara edhe me erë të fortë, por deri më tani nuk raportohen problematika.
Sipas raportimit të DRUK Lezhë, prurjet në lumenj dhe përrenj janë rritur, por mbeten nën kuotat e rrezikut për përmbytje. Nivelet e ujit në Bunë, Drin, Kir, Gjadër si dhe në Rezervuarin e Shtodrës janë normale, ndërsa hidrovoret e Velipojës ndodhen në gadishmëri të plotë.
Sa i përket akseve rrugore, në segmentin Bogë–Theth është regjistruar dëborë në zonën e Qafë Thores, ku qarkullimi kërkon kujdes të shtuar. Në aksin Hani i Hotit–Dogana Vermosh ka pasur rënie inertesh, por grupet e punës ndodhen në terren dhe po kryejnë pastrimin.
Gjithashtu, janë shënuar ndërprerje të energjisë elektrike në disa njësi administrative të bashkive Shkodër, Vau i Dejës dhe Fushë-Arrëz, ndërsa ekipet e OSHEE-së po punojnë për rikthimin e furnizimit./vizionplus.tv
