Mbrojtja e Milanit ka treguar performanca të mira këtë sezon, duke pësuar vetëm 11 gola në kampionat dhe duke mbajtur vendin e dytë për sa i përket mbrojtjes më të fortë, pas Comos dhe Lazios. Megjithatë, klubi italian po kërkon të forcojë këtë sektor në merkaton e janarit.
Edhe pse lojtarët si Tomori, Gabbia dhe Pavlovic kanë kontribuar për suksesin e skuadrës, linja mbrojtëse mbetet e shkurtër. Pas titullarëve të rregullt, përveç Koni De Winter, është vetëm Odogu, i cili ende nuk ka pasur minutat e tij të para pas investimit prej 10 milionë eurosh në gusht. Drejtori i futbollit, Igli Tare, ka një strategji të qartë për të mos shpenzuar shumë ndërsa forcon ekipin, duke kërkuar lojtarë që nuk do komplikojnë marrëdhëniet në dhomën e zhveshjes dhe që mund të ofrojnë cilësi për rotacionin e mbrojtjes.
Sipas “Corriere dello Sport”, një nga objektivat kryesorë të Milanit është qendërmbrojtësi francez i Chelsea-t, Axel Disasi. Ai ka pasur pak hapësirë në Londër dhe është i gatshëm të kalojë në një klub tjetër për të rihapur mundësitë e karrierës së tij. Milan dhe Chelsea kanë krijuar një lidhje të fortë, gjë që mund të lehtësojë transferimin, me mundësinë e një huazimi me opsion blerjeje.
Një alternativë romantike është emri i Thiago Silva, i cili po dëshiron të kthehet në Milano për një aventurë të fundit në Evropë. Megjithatë, nga Casa Milan ka pasur skeptikë lidhur me këtë mundësi, pasi nënshkrimi i tij mund të krijonte tensione me titullarët aktualë dhe të ndikonte në atmosferën e dhomës së zhveshjes. Milan preferon të ketë një asistues të besueshëm dhe të pjekur, më shumë sesa një lojtar që do të sfidonte për një vend titullari.
Prandaj, rikthimi i Thiago Silva duket më shumë një opsion i dytë për Milanin, i cili aktualisht po përqendrohet në objektiva më realë dhe të përballueshëm financiarisht.
