Prokuroria e Küçükçekmece-s në Turqi ka nisur një operacion të gjerë kundër Can Holding, duke dhënë urdhër-arresti për 10 persona, mes tyre edhe pronarët e grupit, Mehmet Şakir Can, Kemal Can dhe Kenan Tekdağ. Operacioni zhvillohet mbi akuzat për “krijim të organizatës kriminale”, “kontrabandë”, “mashtrim” dhe “pastrim parash”, raporton e përditshmja turke ‘SABAH’
Sipas raportit të MASAK (Njësia e Hetimit për Krimin Financiar), në qendër të hetimeve është një skemë e dyshuar për pastrim parash në vlerën e 86 miliardë lirave turke.
Dy prej pronarëve, Mehmet Şakir Can dhe Kemal Can, raportohen si të shpallur në kërkim.
Në kuadër të operacionit, autoritetet sekuestruan 121 kompani të lidhura me Can Holding, të cilat tashmë janë kaluar nën administrimin e Fondit të Sigurimeve të Depozitave (TMSF).
Mes tyre përfshihen kompani në fusha të ndryshme si media, arsim, energji, ndërtim, transport dhe turizëm.
Në listën e sekuestrimeve hyjnë edhe biznese të njohura si Show TV, Habertürk, Kanal 1, Ciner Medya, Doğa Koleji, Golden Hill Turizm dhe shumë të tjera.
Autoritetet theksuan se hetimet do të vazhdojnë në mënyrë transparente dhe se kompanitë e sekuestruara do të menaxhohen nga “tregtarë të kujdesshëm”, duke garantuar stabilitetin financiar.
Ky operacion konsiderohet si një nga më të mëdhenjtë e viteve të fundit në Turqi kundër pastrimit të parave dhe krimit financiar.
