Ndeshja shumë e pritur mes Shqipërisë dhe Serbisë përfundoi me një barazim pa gola, 0-0, në një sfidë ku kuqezinjtë dhanë gjithçka në fushë, por fati nuk ishte në anën e tyre në momentet vendimtare.
Gjatë gjithë takimit, Shqipëria u tregua më kërkuese, duke ndërtuar aksione të rrezikshme dhe duke krijuar disa mundësi të pastra për gol. Megjithatë, mungesa e qetësisë në finalizim dhe forma e shkëlqyer e portierit serb bënë që rrjeta kundërshtare të mbetej e paprekur.
Mundësia më e artë për kuqezinjtë erdhi në fund të pjesës së parë, kur pas një aksioni të bukur u fitua një penallti. Rei Manaj mori përgjegjësinë për ta ekzekutuar, por goditja e tij u neutralizua nga portieri, duke humbur kështu shansin ideal për të kaluar në epërsi.
Edhe në pjesën e dytë ritmi i lojës mbeti i lartë, me Shqipërinë që vazhdoi të shtynte përpara dhe Serbinë që kërkonte të shfrytëzonte kundërsulmet. Pavarësisht përpjekjeve, rezultati mbeti i pandryshuar deri në fund.
Një pikë që mund të ketë peshën e saj, por me një ndjesi zhgënjimi për rastet e shpërdoruara. Shqipëria tregoi karakter, zemër dhe vullnet për fitore, tashmë fokusi është te ndeshja e radhës.
