Policia turke ka arrestuar plot 162 persona të akuzuar për postimin online të mesazheve të kontestuara lidhur me dy incidentet e armatosura që ndodhën në shkollat e vendit në ditët e fundit.
Sipas autoriteteve policore të vendit, të arrestuarit kishin postuar mesazhe ku vlerësohej krimi dhe kriminelët, duke ndikuar negativisht në ruajtjen e rendit publik.
Të paktën 16 persona mbetën të plagosur në incidentin e parë të ndodhur të martën në një shkollë të mesme në lokalitetin Siverek, në jug-lindje të vendit, ndërsa 9 persona mbetën të vrarë në incidentin që pasoi në qytetin Kahramanmaras ditën e mërkurë.
Disa qindra njerëz dhe disa ministra u mblodhën ditën e enjte në afërsi të xhamisë kryesore të qytetit për të marrë pjesë në ceremoninë mortore të viktimave.
Personat që humbën jetën në incidentin e dytë ishin 8 studentë dhe një mësues. Edhe agresori, një djalë 14-vjeçar, mbeti i vrarë. Sipas njoftimeve të prokurorisë, ai e kishte planifikuar sulmin shumë kohë më parë.
Ministri i Drejtësisë, Akin Gurlek tha se 95 individë ishin arrestuar për shkak të ndikimit që mund të kishin mesazhet e tyre.
Ata akuzohen për publikim të materialeve filmike të lidhura me sulmin, pavarësisht ndalimit të transmetimit të tyre, duke krijuar frikë dhe duke inkurajuar akte të tjera kriminale.
Ndërsa 67 të tjerë u ndaluan pasi u akuzuan për postime që sugjeronin se së shpejti do të ndodhnin sulme të mëtejshme në shkolla të tjera.
