Pesë vjet ndërtim, 26 milionë euro investim dhe premtime të përsëritura për një zgjidhje përfundimtare. Por sot, Vlorës i vjen ende era plehra. Mbetjet urbane vazhdojnë të shkarkohen në vendgrumbullimin e vjetër, vetëm pak metra larg zonave të banuara dhe detit. Edhe pse Landfilli i ri në Sherishtë është shpallur zyrtarisht i hapur që në prill, ai rezulton praktikisht jashtë funksionit.
Landfilli i Sherishtës nisi ndërtimin pesë vite më parë nga kompania “Integrated Technology Services”, në pronësi të Klodian Zotos dhe u financua nga një kredi dhe grant nga banka gjermane, me një vlerë totale prej 26 milionë eurosh, nga të cilat 12.5 milion euro kredi. Megjithëse duhej të përfundonte brenda dy vitesh, ai u përurua vetëm këtë vit.
Por realiteti është tjetër. Peshorja, një element bazë për matjen dhe regjistrimin e sasisë së mbetjeve, nuk është vënë kurrë në punë. Sipas drejtoreshës së landfillit, ajo është “e prishur” dhe aktualisht ndodhet “në ruajtje nga policia bashkiake”. Asnjëherë nuk është përdorur.
Në 29 prill, Kryetari i Bashkisë Vlorë, Ermal Dredha, deklaroi publikisht hapjen e landfillit të ri dhe mbylljen e vendgrumbullimit të vjetër, duke premtuar fundin e zjarreve dhe ndotjes.
Por më 7 qershor, Vlora u përfshi sërish nga shtëllunga tymi. Një zjarr tjetër në vendgrumbullimin e vjetër përhapi ndotje në të gjithë qytetin. Policia hapi hetim ndaj drejtorit të Ndërmarrjes së Pastrimit dhe katër punonjësve të bashkisë.
Një vëzhgim në terren nga gazetarët e emisionit Fiks Fare zbuloi se dhjetëra kamionë vijojnë të shkarkojnë çdo ditë në vendgrumbullimin e vjetër. Pamje ajrore tregojnë se hyrja në landfillin e ri është devijuar, duke shmangur peshoren, ndërkohë që shumica e kamionëve nuk hyjnë fare atje.
Një punonjës i landfillit të ri pranoi se vetëm një kamion kishte mbërritur dhe më pas dera ishte mbyllur. Ndërkohë, një pjesë e vogël e mbetjeve që arrijnë në Sherishtë mbulohen me dhe, nuk përpunohen.
Kryetari i Bashkisë, në një intervistë, fillimisht mohoi që mbetjet të shkonin në vendgrumbullimin e vjetër. Më pas, pranoi se kishte shkarkuar nga detyra të gjithë drejtuesit e Ndërmarrjes së Pastrimit. Drejtori i kësaj ndërmarrjeje konfirmoi më pas se në Sherishtë shkojnë vetëm mbetjet nga koshat, ndërsa të gjitha mbeturinat që ndodhen jashtë tyre – përfshirë mbetje të mëdha si elektroshtepiaket – shkojnë në vendgrumbullimin e vjetër.
Kur u pyet për përqindjen e mbetjeve që dërgohen në landfillin e ri, ai nuk kishte një përgjigje.
Ndërkohë që Vlora promovon veten si një qytet turistik modern, plehrat dhe zjarret në periferi vazhdojnë të helmojnë ajrin, ujin dhe reputacionin e saj. Investimi prej miliona eurosh në Sherishtë, i mbuluar me premtime politike, ende nuk ka prodhuar asnjë rezultat konkret. Deri më tani, më shumë sesa zgjidhje, ai është kthyer në një simbol të paaftësisë për të menaxhuar një nga probleme
