Ditën e sotme u firmos marrëveshja mes shoqërisë Ficantieri, një nga kompanitë më të mëdha të ekselencës në Europë dhe kompanisë KAYO, për të prodhuar në Shqipëri në kantierin e Pashalimanit anije lundruese në dobi të ushtrisë shqiptare, por dhe të vendeve aleate.
Ministri i Mbrojtjes, Ermal Nufi, theksoi se ky projekt sjell një etapë të re për industrinë detare shqiptare, duke hapur vende të reja pune dhe duke forcuar kapacitetet eksportuese të vendit.
Sipas tij, me këtë marrëveshje kompania KAYO nis një fazë të re zhvillimi, ku Shqipëria synon të shndërrohet në një bazë rajonale për prodhimin e anijeve të vogla dhe të mesme, në bashkëpunim me gjigantin italian Fincantieri. Nufi u shpreh se projekti parashikon punësimin e rreth 400 personave, duke rritur ndjeshëm kapacitetet prodhuese dhe njerëzore në vend.
“Sot me këtë nënshkrim shoqëria KAYO fillon një hap të ri. Do të arrijmë të prodhojmë për nevojat e eksportit. Shqipëria bëhet një bazë e re europiane e Ficantierit për anijet e vogla e të mesme, zgjeron aktivitetin. Ficantieri do të sjellë edhe punë dhe në planin e biznesit që kemi nënshkruar, rreth 400 persona do të punësohen në këtë kantier të ri. Rritje të kapaciteteve vendase prodhuese dhe humane”, tha ministri i Mbrojtjes Ermal Nufi.
Nga ana tjetër, përfaqësuesi i Fincantieri-t e cilësoi marrëveshjen si një iniciativë me vizion strategjik dhe ambicie të lartë, që synon jo vetëm prodhimin për tregun vendas, por edhe zhvillimin e produkteve konkurruese për eksport, përmes modernizimit të proceseve dhe teknologjisë në ndërtimin e anijeve.
“Siç sapo kemi diskutuar, ka shumë strategji dhe ambicie pas kësaj marrëveshjeje. S’është vetëm dëshira për të ndjekur një program por për të lëshuar diçka produktive me ambicie. Mund të kemi një produkt që ta përdorim në eksportin e Ficantierit, duke pasur modernizim, konkurrencë dhe ide anijeje e procesi produktiv ndryshe”, tha përfaqësuesi i Ficantierit.
