Manchester United po përgatitet të bëjë një lëvizje të madhe në merkato për të përforcuar mesfushën. Pas dështimit për disa objektiva të tjerë, klubi anglez ka kthyer vëmendjen te Aurélien Tchouaméni i Real Madridit.
Sipas raportimeve, drejtuesit e United janë të gatshëm të ofrojnë mbi 100 milionë euro për mesfushorin francez, të cilin e konsiderojnë si përforcimin ideal për qendrën e mesfushës.
“Djajtë e Kuq” kishin tentuar më parë të transferonin Mateus Fernandes, por hezitimi për strukturën e pagesës i hapi rrugën Tottenhamit. Me emra të tjerë si Sandro Tonali dhe Elliot Anderson tashmë jashtë mundësive, United e di se duhet të paguajë shifra të mëdha për të mos mbetur pas në këtë repart.
Fabrizio Romano ka raportuar se Tchouaméni shihet brenda klubit si profili perfekt për të zëvendësuar Casemiron. Ai vlerësohet për nivelin e lartë, mentalitetin fitues dhe eksperiencën në elitë.
Megjithatë, operacioni mbetet i vështirë. Një nga pengesat kryesore është paga e lartë që Tchouaméni merr te Real Madrid, ndërsa United do të kërkonte një marrëveshje me kushte të ndryshme financiare.
Problemi tjetër është qëndrimi i Real Madridit. Për momentin, klubi spanjoll nuk i ka dhënë asnjë sinjal Manchester Unitedit për të hapur negociatat. Tchouaméni konsiderohet ende pjesë e rëndësishme e projektit në Madrid.
Pavarësisht vështirësive, mesfushori francez mbetet “ëndrra” e madhe e Manchester United për merkaton. Nëse Real Madrid ndryshon qëndrim, oferta e klubit anglez mund ta bëjë këtë një nga operacionet më të mëdha të verës.
