Kriza në futbollin italian është thelluar edhe më shumë. Paolo Maldini dhe Leonardo kanë dhënë dorëheqjen nga postet e tyre në Federatën Italiane, vetëm 16 ditë pas emërimit.
Dy drejtuesit kishin mbështetur fuqishëm kandidaturën e Andrea Pirlos për stolin e kombëtares, pas refuzimeve të Pep Guardiolës dhe Carlo Ancelottit. Megjithatë, kundërshtimet brenda federatës dhe polemikat rreth bashkëpunimit të Pirlos me kompaninë ruse të basteve Fonbet bllokuan marrëveshjen.
Maldini kishte pranuar rolin e drejtorit teknik pasi i ishte garantuar liri e madhe vendimmarrjeje, ndërsa Leonardo ishte afruar si këshilltar. Pas takimit të fundit me presidentin Giovanni Malagò, të dy arritën në përfundimin se autonomia e premtuar nuk ekzistonte në praktikë dhe vendosën të largoheshin.
Tashmë, Italia duhet të nisë nga e para kërkimet për trajnerin e ri. Roberto Mancini mbetet emri i preferuar i Malagòs, ndërsa klubet e Serie A mbështesin kandidaturën e Antonio Contes.
Një tjetër tronditje për “Azzurrët”, të cilët ende nuk kanë gjetur drejtimin e duhur për të nisur rindërtimin.
