Pamje që ngjajnë më shumë me një shkretëtirë sesa me një nga lumenjtë më të njohur të Europës po regjistrohen në Francë, ku lumi Luara (Loire), më i gjati në vend, është përballur me një rënie drastike të nivelit të ujit për shkak të thatësirës ekstreme dhe valës historike të të nxehtit që ka përfshirë Europën Perëndimore.
Në disa zona, përfshirë Monzanjë-sur-Luara, shtrati i lumit është kthyer në sipërfaqe të gjera rëre, ndërsa vetëm disa pellgje të vogla me ujë kanë mbetur nga rrjedha dikur e fuqishme. Pamjet tregojnë përmasat e krizës klimatike që po prek një nga pasuritë natyrore më të rëndësishme të Francës.
Loire shtrihet për rreth 1 mijë kilometra dhe konsiderohet lumi më i madh i Francës, por temperaturat e larta të vazhdueshme dhe mungesa e reshjeve kanë ndryshuar ndjeshëm pamjen e tij. Ekspertët paralajmërojnë se situata tregon ndikimin e drejtpërdrejtë të kushteve ekstreme të motit mbi burimet ujore.
Vala e të nxehtit e muajit qershor është cilësuar si një nga më të fortat e regjistruara ndonjëherë në Europë për këtë periudhë. Në Francë, temperaturat rekord kanë shkaktuar mbylljen e shkollave, probleme me furnizimin me energji elektrike dhe mijëra viktima të lidhura me të nxehtin ekstrem.
Për shkak të mungesës së ujit, autoritetet franceze kanë vendosur kufizime në disa zona, duke u kërkuar banorëve të reduktojnë konsumin, të shmangin ujitjen e kopshteve, larjen e makinave dhe mbushjen e pishinave private.
Sipas shkencëtarëve, temperaturat ekstreme lidhen me një fenomen atmosferik që ka bllokuar masa të nxehta ajri mbi Europë, i njohur si “kupola e nxehtësisë”. Ky fenomen është përforcuar edhe nga depërtimi i ajrit të nxehtë nga Sahara drejt kontinentit europian.
