Analisti Fatos Lubonja ka komentuar zhvillimet e fundit lidhur me çështjen e Belinda Ballukut, pas vendimit të Gjykata Kushtetuese e Shqipërisë për lënien në fuqi të pezullimit të saj.
Në një intervistë për News 24, Lubonja u shpreh se SPAK duhej të kishte kërkuar që në fillim masën e arrestit për Ballukun dhe jo pezullimin, duke argumentuar se kërkesa për pezullim e zhvendosi çështjen drejt Gjykatës Kushtetuese.
Sipas tij, reagimi i faktorit ndërkombëtar është elementi kyç në këtë situatë. Lubonja tha se Bashkimi Evropian dhe përfaqësuesit e tij duhet të ushtrojnë më shumë presion për të mbështetur vendimet e drejtësisë, duke shtuar se nuk është i sigurt nëse ky presion do të jetë i mjaftueshëm.
Do të dëshironim të ishte kështu që BE, KE të ngulmonin dhe në një farë kuptimi do të ishte presion i madh që i shtohej gjithë situatës, mbështetje ndaj këtyre vendimeve të fundit, veçanërisht të SPAK. Të them të drejtën nuk jam i sigurt, ndoshta do më quani skeptik, por do të doja që e para kemi këtu KE, ambasadorin dhe kanë kaluar kaq kohë e shikojnë se çfarë bëhet në Shqipëri. Nuk duhet të prisnin rasti Balluku për të kuptuar se çfarë bëhet në Shqipëri. Kanë qenë mbështetës për të futur Shqipërinë kështu që teza ime është pak më e kujdesshme. Koha do ta provojë.
Mendoj se reagimi qytetar nuk është në atë nivel sa të detyrojë Ramën që të pranojë pavarësinë e drejtësisë, pa kontrollin e tij. Mendoj se faktor kryesor do të ishte guximi dhe parimshmëria e të gjithë organeve të drejtësisë, që nuk e shoh në nivelin e duhur. Që në fillim SPAK duhet të kishte kërkuar arrestin dhe jo me atë kërkesë që topi të shkonte te GJK. Edhe protestat e opozitës nuk i shoh si faktor kaq të rëndësishëm. Më i rëndësishmi mbetet faktori ndërkombëtar. Nuk jam i sigurt që ky faktor është kaq i vendosur që ka parë një padrejtësi që nuk mund të lejohet më dhe kërkon me ngulm se përndryshe do të bëjë punët e veta. Kur Berisha bënte sulme ndaj SPAK, ndërhynin të gjithë këta. Këtu akoma nuk thonë një fjalë për Edi Ramën.”, u shpreh Lubonja.
