Rrugët e kryeqytetit shqiptar Tiranë janë mbushur me postera të mëdhenj që shfaqin portretet e komandantëve të Ushtrisë Çlirimtare të Kosovës (UÇK), të cilët aktualisht po gjykohen në Hagë nga Dhomat e Specializuara.
Siç shihet nga pamjet në terren, këto postera janë vendosur në tabela publike në zona të ndryshme të Tiranës, duke sjellë në vëmendje rolin e këtyre figurave kyçe gjatë luftës për çlirimin dhe pavarësinë e Kosovës.
Ish-krerët e UÇK-së, përfshirë Hashim Thaçi, Kadri Veseli, Rexhep Selimi dhe Jakup Krasniqi, prej vitesh përballen me drejtësinë ndërkombëtare nën akuza për krime lufte dhe krime kundër njerëzimit. Megjithatë, në Shqipëri dhe Kosovë ata vazhdojnë të gëzojnë përkrahje të gjerë dhe konsiderohen si figura të rëndësishme të rezistencës kombëtare.
Vendosja e këtyre posterave në rrugët e Tiranës vjen si një formë simbolike nderimi dhe solidariteti me ta, në një kohë kur procesi gjyqësor në Hagë vijon. Ky akt synon të rikujtojë sakrificën dhe rolin historik të UÇK-së në arritjen e lirisë dhe pavarësisë së Kosovës.
