Një përshkallëzim i ri dhe i rrezikshëm i konfliktit në Lindjen e Mesme u shënua mbrëmjen e 7 qershorit, pasi Irani dhe Izraeli shkëmbyen sulme, duke zbehur shpresat për një armëpushim dhe duke rritur frikën për një konflikt më të gjerë rajonal.
Tensionet nisën pasi Irani lëshoi raketa drejt veriut të Izraelit, në atë që Teherani e paraqiti si kundërpërgjigje ndaj sulmeve të mëparshme izraelite. Menjëherë pas kësaj, Izraeli ndërmori sulme ajrore ndaj objektivave ushtarake në Iranin perëndimor dhe qendror. Sipas Forcave të Mbrojtjes së Izraelit (IDF), avionët luftarakë goditën një sërë objektivash ushtarake në territorin iranian. Mediat lokale raportuan shpërthime në Teheran, Tabriz dhe Isfahan, ndërsa sulmet u konfirmuan edhe nga Garda Revolucionare Islamike e Iranit (IRGC) përmes agjencisë shtetërore iraniane të lajmeve IRNA.
Sipas raportimeve, në Teheranin perëndimor u dëgjuan dy shpërthime të fuqishme në orët e para të mëngjesit. Autoritetet iraniane deklaruan se nuk u goditën zona urbane, por ekipet e emergjencës dhe zjarrfikësit u vendosën në gatishmëri të lartë. Përpara sulmeve izraelite, presidenti amerikan Donald Trump kishte zhvilluar kontakte me kryeministrin izraelit Benjamin Netanyahu, duke i kërkuar të shmangte një kundërpërgjigje të menjëhershme ushtarake ndaj Iranit. Sipas raportimeve të mediave amerikane, Trump besonte se negociatat mes Uashingtonit dhe Teheranit ndodheshin pranë një marrëveshjeje dhe se një përshkallëzim i ri ushtarak mund të rrezikonte procesin diplomatik.
Fillimisht, Netanyahu thuhet se pranoi me rezerva kërkesën e presidentit amerikan për të shtyrë reagimin ushtarak, por vetëm disa orë më vonë Izraeli njoftoi se kishte kryer sulme ndaj objektivave iraniane. Një zyrtar amerikan deklaroi se administrata amerikane vazhdon të besojë se një marrëveshje me Iranin është e mundur dhe se nuk dëshiron që zhvillimet ushtarake të minojnë negociatat.
Irani godet baza ajrore izraelite
Nga ana e saj, Garda Revolucionare Islamike e Iranit njoftoi se kishte goditur bazat ajrore izraelite Nevatim dhe Tel Nof, duke e cilësuar operacionin si përgjigje ndaj sulmeve izraelite kundër stacioneve të radarëve në disa zona të Iranit. Autoritetet iraniane paralajmëruan se çdo sulm i ri nga Izraeli do të marrë një përgjigje edhe më të fortë, duke shtuar pasigurinë në rajon.
Goditet uzina petrokimike në Mahshahr
Në mesin e objektivave të goditura nga Izraeli ishte edhe Kompania Petrokimike Karoon në qytetin Mahshahr, në jugperëndim të Iranit.
Sipas autoriteteve lokale iraniane, raketat izraelite shkaktuan dëme në një pjesë të objektit industrial. Zëvendësguvernatori i rajonit deklaroi se sulmi preku një segment të uzinës, ndërsa ekipet teknike po punojnë për vlerësimin e plotë të dëmeve. Edhe Forcat e Mbrojtjes së Izraelit konfirmuan se uzina petrokimike në Mahshahr ishte një nga objektivat e operacionit ajror.
Frikë për zgjerim të konfliktit
Përplasja e fundit vjen në një kohë kur përpjekjet diplomatike për një marrëveshje mes Shteteve të Bashkuara dhe Iranit vazhdojnë, por zhvillimet e fundit tregojnë se situata mbetet jashtëzakonisht e brishtë. Analistët paralajmërojnë se çdo sulm i ri mund të çojë në një përshkallëzim të pakontrolluar të konfliktit, me pasoja serioze për sigurinë rajonale, tregjet globale të energjisë dhe stabilitetin në të gjithë Lindjen e Mesme.
