Lionel Messi ka nënshkruar zyrtarisht kontratën e re me Inter Miami, duke zgjatur bashkëpunimin me klubin amerikan deri në fund të sezonit 2028, ka konfirmuar të enjten Major League Soccer.
Në një postim në rrjetin “X”, MLS shkroi: “Zyrtare: Leo Messi do të vazhdojë të jetë lojtar i MLS me Inter Miami.”
Vetë klubi publikoi një video ku Messi shihet duke nënshkruar kontratën në një tavolinë në mes të stadiumit të ri të skuadrës, i cili është ende në ndërtim, me mbishkrimin e thjeshtë: “He’s Home.”
Kontrata e re, që zgjat tre vite më shumë se marrëveshja aktuale (që skadonte në fund të sezonit 2025), do ta mbajë kampionin e botës aktiv në futbollin konkurrues edhe pas Botërorit 2026, që do të zhvillohet në SHBA, Kanada dhe Meksikë.
Messi, 38 vjeç, u bashkua me Inter Miami në vitin 2023 pas një periudhe jo të lumtur te Paris Saint-Germain, ndërsa pjesën më të madhe të karrierës e kaloi te Barcelona (2004–2021), ku fitoi 10 tituj të La Ligës dhe 4 Champions League.
Ai ka qenë gjithashtu lider i kombëtares së Argjentinës, me të cilën ka fituar Kupën e Botës 2022 dhe dy Kupa Amerika (2021 dhe 2024). Me 114 gola ndërkombëtarë, Messi mbetet një nga golashënuesit më të mirë në histori.
Në MLS, ylli argjentinas ka shkëlqyer. Ai u shpall lojtari më i vlefshëm i sezonit 2024, dhe në vitin 2025 u bë lojtari më i shpejtë që arrin 40 gola në historinë e ligës.
Në këtë sezon, Messi udhëhoqi Inter Miami-n drejt fazës “playoff”, duke mbyllur kampionatin me një hat-trick në fitoren 5–2 ndaj Nashville SC — dhe duke fituar Këpucën e Artë me 29 gola në 28 ndeshje.
