Gjermania ka marrë një lajm të keq pak ditë para nisjes së Kupës së Botës. Lennart Karl, një nga zbulimet e sezonit te Bayern Munich, do të mungojë në Botërorin 2026 për shkak të një dëmtimi muskulor të pësuar në stërvitje.
Federata Gjermane e Futbollit konfirmoi se trajneri Julian Nagelsmann ka thirrur Assan Ouédraogo të RB Leipzig si zëvendësues të mesfushorit ofensiv 18-vjeçar.
Karl reagoi edhe vetë në rrjetet sociale, duke e cilësuar mungesën në Botëror si një dhimbje të madhe. Ai theksoi se kishte bërë gjithçka për të qenë gati, por dëmtimi erdhi në momentin më të keq të mundshëm.
“Më dhemb jashtëzakonisht shumë që do të humbas turneun më të madh. I uroj skuadrës gjithë të mirat dhe do t’i mbështes në çdo moment. Do të kthehem më i fortë, premtoj”, shkroi ai.
Nagelsmann u shpreh i trishtuar për mungesën e talentit të Bayern, duke theksuar se Karl ishte përshtatur shumë mirë me grupin falë cilësive, shpejtësisë dhe karakterit të tij.
Edhe Bayern Munich reagoi me një mesazh mbështetjeje, duke theksuar se klubi do t’i qëndrojë pranë lojtarit gjatë rikuperimit.
