Zbardhen detaje nga dëshmia e shefit të Komisariatit të Sarandës, Gëzim Bashllari, i arrestuar pas aksionit policor për ndërtimet pa leje.
Sipas burimeve, Bashllari ka dhënë deklarata surprizuese para hetuesve të AMP-së. Ai është shprehur se gjatë kësaj jave ka qenë i zënë me hetimin e vrasjes së ndodhur në Sarandë dhe për këtë arsye, nuk ka pasur kohë të merrej me ndërtimet pa leje.
Kujtojmë se shefi i komisariatit, Gëzim Bashllari, së bashku me tre inspektorë të policisë Andi Duro, Ajdin Ismailaj dhe Robert Çullaj u arrestuan nën dyshimet për shpërdorim detyre, duke favorizuar ndërtimin pa leje të një stacioni plazhi me beach bar në vijën bregdetare. Sipas hetimeve, pas këtij ndërtimi pa leje dyshohet se qëndron një grup kriminal me bazë në Kamëz.
Ende nuk dihet nëse drejtuesit e Komisariatit të Policisë Sarandë kanë përfituar ryshfet, por hetimet paraprake sugjerojnë se ata janë paguar nga ky grup kriminal për të mos ndërhyrë ndaj ndërtimit pa leje.
Agjencia e Mbikëqyrjes Policore është vënë në lëvizje pas një referimi që është bërë nga vetë kryepolici Skënder Hita, sepse një qytetar kishte denoncuar tek ai situatën në terren në Sarandë, dhe menjëherë u shkarkua dhe u arrestua gjithë zinxhiri drejtues.
