Sot, në orën 14:00, u jepet lamtumira e fundit dy fëmijëve që humbën jetën tragjikisht pas një aksidenti të rëndë në Durrës.
Nikoll Radaçi, 57 vjeç, duke drejtuar automjetin në gjendje të dehur dhe me shpejtësi, ka përplasur katër fëmijë që po luanin në trotuar. Si pasojë, humbën jetën K. Nikolli, 9 vjeç dhe E. Muçaj, 12 vjeç, ndërsa 8-vjeçari A. Meslani mbeti i plagosur rëndë dhe ndodhet në Spitalin e Traumës, në gjendje të qëndrueshme. Fëmija i katërt fatmirësisht shpëtoi pa lëndime.
Ngjarja bëhet edhe më e dhimbshme për shkak të rrethanave familjare. Prindërit e 9-vjeçarit ndodheshin në Itali për kurimin e babait dhe janë kthyer me urgjencë mbrëmjen e djeshme. Në momentin e aksidentit, ai ishte me gjyshen dhe motrën, ndërsa po luante me bashkëmoshatarët pranë një supermarketi.
Drejtuesi i automjetit u arrestua pak minuta pas ngjarjes. Ai kishte braktisur mjetin në përpjekje për t’u larguar, por u kap nga policia. Sipas të dhënave, ai rezulton person me precedent për shkelje të rregullave të qarkullimit rrugor dhe ishte ndëshkuar disa herë me masa administrative.
Një ditë pas aksidentit, është pezulluar nga detyra drejtori i Policisë së Qarkut Durrës, Afrim Tafa, ndërsa në vend të tij është caktuar përkohësisht Ervin Hodaj.
Autoritetet vijojnë hetimet për zbardhjen e plotë të rrethanave të aksidentit, i cili ka shkaktuar reagim të fortë në opinionin publik.
