Luis de la Fuente ka dhënë sinjale pozitive për gjendjen e Lamine Yamal dhe Nico Williams para debutimit të Spanjës në Kupën e Botës.
Trajneri i “La Roja” deklaroi se të dy lojtarët, së bashku me Víctor Muñoz, po ndjekin afatet e rikuperimit dhe pritet të jenë të disponueshëm për ndeshjen e parë ndaj Kepit të Gjelbër, më 15 qershor.
“Nico, Lamine dhe Víctor po rikuperohen sipas planit dhe janë shumë mirë. Ishte më e përshtatshme që të qëndronin në bazë për të bërë punë më specifike”, u shpreh De la Fuente.
Megjithatë, trajneri spanjoll pranoi se aktivizimi i tyre si titullarë është më i komplikuar. Sipas tij, lojtarët pritet të jenë në dispozicion, por minutat që do të marrin do të vendosen në varësi të gjendjes së tyre në ditët e ardhshme.
Yamal, Williams dhe Muñoz nuk udhëtuan me skuadrën drejt Meksikës për miqësoren e fundit ndaj Perusë, por qëndruan në kampin bazë në Chattanooga për të vazhduar rikuperimin.
Ndërkohë, Yéremy Pino u shpreh se është krenari që Spanja konsiderohet një nga favoritet për të fituar Botërorin, duke theksuar se kjo duhet t’i japë besim skuadrës dhe jo presion.
