Një punonjës i OSHEE-së ka humbur jetën në orët e para të mëngjesit të sotëm, gjatë një ndërhyrjeje për riparimin e një defekti në rrjetin elektrik në zonën e Himarës.
Ngjarja ka ndodhur rreth orës 03:00, pas problemeve të shkaktuara në rrjet nga moti i keq dhe erërat e forta, të cilat sollën ndërprerje të energjisë elektrike në disa zona. Punonjësi 55-vjeçar, Bashkim Boçi nga Elbasani, ishte dërguar për të ndihmuar ekipet e OSHEE-së në rikthimin e energjisë për abonentët.
Dyshimet paraprake janë se ai mund të jetë goditur nga rryma elektrike gjatë punës. Rrethanat e plota të ngjarjes ende nuk janë bërë të ditura, ndërsa grupi hetimor ndodhet në vendngjarje dhe po punon për zbardhjen e shkaqeve të aksidentit. Pritet edhe ekspertiza teknike që do të përcaktojë përfundimisht mënyrën se si ka ndodhur ngjarja.
Pas aksidentit tragjik ka reaguar ministri i Energjisë dhe Infrastrukturës, Enea Karakaci, i cili ka shprehur ngushëllimet për familjen dhe kolegët e punonjësit të ndjerë.
“Pas çdo rikthimi të energjisë, është kontributi i njerëzve që punojnë në kushte të rrezikshme, larg familjeve të tyre, për t’u shërbyer qytetarëve. Sot, një prej tyre nuk u kthye më”, u shpreh ministri.
Ministri theksoi se Bashkim Boçi ishte pjesë e OSSH Elbasan që prej vitit 2000 dhe e kishte ushtruar detyrën me përkushtim dhe profesionalizëm deri në momentin e fundit.
“Me dhimbje të thellë mora lajmin për humbjen e jetës së kolegut tonë, Bashkim Boçi, i cili ra në krye të detyrës, ndërsa ishte i angazhuar në riparimin e defekteve të shkaktuara nga moti i keq në zonën e Himarës”, deklaroi Karakaçi.
Ministri i ka shprehur ngushëllimet më të sinqerta familjes, të afërmve dhe kolegëve të 55-vjeçarit, duke nderuar kontributin dhe sakrificën e tij në shërbim të qytetarëve.
“U prehtë në paqe”, përfundoi mesazhin e saj Karakaçi.
