Ky që shihni në këtë pamje është autori i vraskes së 44-vjeçarit Artan Myrtaj pak ditë më parë në Sarandë.
Në këtë foto të siguruar nga “Iliria News”, personi që kreu krimin duket se mban në duar dy armë dhe është i veshur me një xhup në ngjyrë jeshile, pantallona të zeza dhe me skafandër në kokë.
Sipast detajeve që kanë zbardhur hetimet, fillimisht autori ka qëlluar me pistoletën me silenciator dhe, pasi i është bllokuar, ka qëlluar me pistoletën tjetër që e mban në dorën e djathtë.
Artan Myrtaj u vra paraditen e së dielës, më 20 shtator, në zonën e njohur si ish-Agjencia, në qytetin e Sarandës, ku krahas tij, u plagos edhe një 73-vjeçar.
Autori nuk ishte vetëm por bashkë me një tjetër person që drejtonte motorrin e zi. Pas ekzekutimit, autorët kanë shkuar drejt Konispolit, teksa nuk përjashtohet mundësia që të jenë arratisur ilegalisht drejt Greqisë.
Hetimet për këtë ngjarje vijojnë, teksa ekzekutimi i Myrtaj dyshohet se lidhet me një sërë ngjarjesh të regjistruara në Sarandë, që zanafillën e kanë në një plagosje të regjistruar në korrik të vitit 2025. Myrtaj rezulton të ketë qenë pjesë e atij konflikti, ndaj dhe hetuesit janë përqendruar te kjo pistë hetimi.
