Gjatë punimeve të Kuvendit Kombëtar të Partisë Demokratike, kryetari Sali Berisha prezantoi shtyllat kryesore të programit të PD-së, duke vënë theksin te ekonomia, rritja e pensioneve dhe pagave, si dhe lufta ndaj krimit të organizuar dhe korrupsionit.
Berisha tha se prioritet i parë i opozitës është përballja me varfërinë, duke premtuar rritje të ndjeshme të pensioneve dhe vendosjen e një minimumi jetik për qytetarët.
“Minimumi jetik, dyfishim dhe trefishim i pensioneve, me një objektiv: të dalim në krye të rajonit për rrogat dhe pensionet”, u shpreh Berisha.
Ai premtoi gjithashtu mbështetje për fëmijët, nënat e reja dhe të rinjtë, duke theksuar se programi i PD-së synon të frenojë emigracionin dhe të krijojë mundësi në vend.
“Të rinjtë shqiptarë duhet të ndërtojnë ëndrrën e tyre në Shqipëri”, deklaroi ai, duke premtuar prioritet për punësim, arsim dhe strehim.
Berisha u ndal edhe te bujqësia, duke premtuar rritje të subvencioneve për fermerët, të cilët sipas tij janë sot të pambështetur.
Kreu i PD-së tha se partia e tij do të ruajë taksat e ulëta dhe ekonominë e tregut.
Ai përmendi gjithashtu rënien e euros dhe dollarit në Shqipëri, duke e cilësuar si tregues të keqmenaxhimit ekonomik dhe ndikimit të krimit të organizuar.
Në vijim të fjalës, Berisha akuzoi qeverinë për manipulim të zgjedhjeve dhe prezantoi dokumente, sipas tij, që provojnë parregullsi në proceset zgjedhore.
Një pjesë e rëndësishme e programit të PD-së, sipas Berishës, do të jetë edhe lufta ndaj krimit të organizuar dhe karteleve të drogës.
“Zero tolerancë ndaj krimit. Do ta shtypim krimin siç e kemi provuar”, u shpreh ai, duke shtuar se në këtë betejë do të përfshihen edhe strukturat e policisë dhe drejtësisë.
Berisha tha se pastrimi i institucioneve nga korrupsioni dhe lidhjet kriminale do të jetë pjesë e reformës së thellë që PD synon të ndërmarrë, duke e cilësuar ripërtëritjen e partisë si bazë për ndryshimin e vendit.
