Dëmtimet vazhdojnë të godasin yje të mëdhenj në prag të Kupës së Botës 2026. Së fundmi, listës i është shtuar edhe Éder Militao, i cili do t’i nënshtrohet operacionit pas një dëmtimi në biceps femoris të këmbës së majtë dhe pritet të mungojë rreth katër muaj. Kjo do të thotë se mbrojtësi i Real Madridit nuk do të luajë më këtë sezon dhe do të humbasë edhe Botërorin me Brazilin.
Fillimisht, dëmtimi i Militaos dukej më i lehtë dhe parashikohej një mungesë prej 4-5 javësh, por ekzaminimet treguan se problemi ishte më serioz. Për të shmangur rikthimin e dëmtimit në të ardhmen, është vendosur ndërhyrja kirurgjikale, që e lë jashtë për një periudhë shumë më të gjatë.
Militao nuk është i vetmi emër i madh që do ta ndjekë turneun nga jashtë fushe. Në listën e lojtarëve që pritet të humbasin Kupën e Botës për shkak dëmtimi janë edhe Jack Grealish, Joško Gvardiol, Luis Ángel Malagón, Serge Gnabry, Samu Omorodion, Joaquín Panichelli, Rodrygo Goes, Hugo Ekitike, Takumi Minamino, Mohammed Salisu dhe Juan Foyth.
Disa raste mbeten ende për t’u ndjekur me kujdes, si ai i Cristian Romero, pjesëmarrja e të cilit në Botëror nuk është përjashtuar plotësisht, por mbetet në dyshim pas dëmtimit në gju. Për kombëtaret përkatëse, këto mungesa janë goditje të rënda në një moment kur përgatitjet për turneun po hyjnë në fazën më vendimtare.
