Pas ndërprerjes së seancës konstituive të Kuvendit të Kosovës, kryetari i Vetëvendosjes, Albin Kurti, ka reaguar për tensionet e krijuara në sallë, përfshirë edhe momentin kur u qëllua me vezë.
Kurti tha se nuk shqetësohet nga veprimi i opozitës, por kërkoi që partitë politike të ulen në tryezë për të gjetur një zgjidhje për konstituimin e institucioneve.
Ai theksoi se, nëse goditja me vezë është çmimi që duhet të paguajë për të bindur opozitën të ulet në tryezën e bisedimeve, është i gatshëm ta pranojë.
“Vazhdimi i seancës përcaktohet nga kryesuesi i seancës e cila ka filluar, por përfundon atëherë kur të zgjidhet kryetari dhe 5 nënkryetarët. Edhe nëse bëhen aksione të tilla kundër meje, unë nuk jam këtu për veten time, jam për Kosovën, kërkojnë të ulemi bashkë dhe për Kosovën të bëjmë marrëveshje.
Nëse gjuajta me vezë dhe goditja e pantallonave të kryeministrit, është çmimi që unë duhet të paguajë në mënyrë që ata të ulen e të bisedojmë, jam i lumtur ta paguaj. Vetëm të vijnë në takim. Unë nuk ankohem që ata hedhin vezë, unë ankohem që ata s’duan të takohen”, u shpreh kryetari i LVV-së.
