Juria ndërkombëtare e Bienales së Venecias ka dhënë dorëheqjen vetëm pak ditë para hapjes zyrtare të një prej ngjarjeve më të rëndësishme të artit bashkëkohor në botë, duke shkaktuar reagime në skenën kulturore ndërkombëtare.
Bienalja njoftoi se juria është tërhequr pa dhënë arsye zyrtare ndërsa vendimi vjen në një klimë tensionesh të lidhura me pjesëmarrjen e Rusisë në aktivitet.
Qeveria italiane, e drejtuar nga Giorgia Meloni, ka shprehur kundërshtim për pjesëmarrjen ruse, por ka theksuar se Bienalja është një institucion autonom. Ndërkohë, Ministria e Kulturës ka dërguar inspektorë në Venecia për të verifikuar situatën rreth pavijonit rus.
Si pasojë e dorëheqjes së jurisë, organizatorët kanë vendosur që çmimet kryesore të përzgjidhen nga vetë vizitorët. Fituesit pritet të shpallen në përfundim të ekspozitës, më 22 nëntor.
Në të njëjtën kohë, Bashkimi Evropian ka tërhequr një grant prej 2 milionë eurosh për Bienalen, duke e lidhur vendimin me pjesëmarrjen e Rusisë, për herë të parë që nga nisja e luftës në Ukrainë në vitin 2022.
Organizatorët e Bienales theksojnë se nuk kanë kompetencë të ndalojnë pjesëmarrjen e një shteti të njohur dhe se synojnë të ruajnë hapësirën e dialogut dhe lirisë artistike.
Debati mbi raportin mes artit dhe politikës pritet të mbetet i fortë gjatë gjithë edicionit të këtij viti.
