Gjatë konferencës së 8-të Ndërqeveritare mes Shqipërisë dhe Bashkimit Europian, Komisionerja Europiane për Zgjerimin, Marta Kos, deklaroi se progresi i Shqipërisë në rrugën europiane është bërë i mundur falë mbështetjes së fortë të qytetarëve shqiptarë dhe përkushtimit ndaj reformave.
Komisionerja europiane tha se BE mbështet vizionin e Shqipërisë për të mbyllur negociatat deri në vitin 2027 dhe, me nota humori, premtoi se nëse ky objektiv arrihet, do të ngjisë malin e Korabit së bashku me kryeministrin Edi Rama.
“Ky sukses është i mundur për shkak të mbështetjes së fortë të qytetarëve shqiptarë. Shqipëria po shfrytëzon këtë moment historik ku zgjerimi është përparësi e BE-së. Ne mblidhemi këtu sa herë që flasim për kapitujt. Por gjithçka që bëjmë e bëjmë për njerëzit. Kjo mbështetje kaq e lartë në vendin tuaj është udhëheqja më e mirë që mund të ketë vendi. Nëse dikush e kupton se kjo derë mundësie nuk mund të jetë e hapur gjithmonë, ky është vendi juaj. Dhe duke kuptuar këtë ju mund të jeni të suksesshëm. Kur flasim për datën, ju thashë që mbështesim vizionin e Shqipërisë për mbylljen e negociatave deri në fund teë vitit 2027 dhe pastaj do i ngjitem Korabit bashkë me kryeministrin. Kjo është e vetmja piketë shtesë mbyllëse që kam pasur sot”, tha ajo.
Pas deklaratës së saj, kryeministri Rama iu përgjigj me humor, duke thënë se ngjitja në Kullën Eiffel është më e vështirë sesa ngjitja në malin e Korabit.
“Mund t’i ngjitemi Kullës Eiffel kur Franca të thotë ‘mirë se erdhët në klub’, është më e vështirë se Korabi”, tha Rama.
