Policia e Durrësit ka arrestuar një 36-vjeçar të shpallur në kërkim në kuadër të operacionit “The key”.
36-vjeçari akuzohet se është bashkëpunëtor në vjedhjen e një shumë parash dhe bizhuterish në një banesë duke përdorur kopje të çelësit të derës.
Në pranga ka rëndë shtetasi Alfred Hoxha, 36 vjeç, banues në Durrës.
Ky shtetas ishte shpallur në kërkim më datë 14.09.2024, në lidhje me vjedhjen e një shume parash dhe bizhuterish, në një banesë në lagjen nr.18, Durrës.
Për këtë rast, në shtator, janë arrestuar shtetasja E. K., 33 vjeçe dhe F. H., 42 vjeç, të dy banues në Durrës.
33-vjeçarja, e punësuar sanitare në këtë banesë, dyshohet se ka siguruar kopje të çelësit të derës dhe ua ka dhënë 42-vjeçarit dhe 36-vjeçarit (vëllezër), të cilët dyshohet se më pas kanë kryer vjedhjen.
Gjithashtu, në shtator, shërbimet e Policisë kanë gjetur në banesën e 42-vjeçarit dhe kanë sekuestruar në cilësinë e provës materiale, një varëse dhe një unazë floriri, një shumë parash dhe një automjet që dyshohet se është përdorur gjatë kryerjes së vjedhjes.
Tre të arrestuarit akuzohen për veprën penale “Vjedhja”, kryer në bashkëpunim.
