Kreu i SPAK, Klodian Braho e ka cilësuar bashkëpunimin ndërkombëtar si të rëndësishëm në punën e Prokurorisë.
Ai mori pjesë në Konferencën e 42-të të Shoqatës së ish-Studentëve Evropianë të Akademisë Kombëtare të FBI-së, FBINAA European Chapter, ku vlerësoi punën kundër krimit të organizuar, duke shtuar se nuk do të ishte e mundur pa bashkëpunimin ndërkombëtar.
Ai theksoi se bashkëpunimi me institucionet e huaja janë të rëndësishme pasi një hetim mund të nisë në Tiranë por komunikimet, transfertat bankare apo pasuritë kriminale mund t’i çojnë në vende të tjera.
“Për SPAK, bashkëpunimi ndërkombëtar është pjesë thelbësore e punës tonë një hetim. Mund të nisë në Tiranë, ndërsa komunikimet, transfertat bankare, e pasuritë që kërkojmë të gjurmojmë na çojnë në disa shtete të tjera. Në këto raste, përparimi i hetimit varet edhe nga kolegu që kupton kërkesën tonë, e trajton atë me përgjegjësi dhe ndihmon të sigurojë provën që mungon.
Është shumë e rëndësishme që të njohësh institucionin që drejton dhe të kesh besim te profesionistët që punojnë atje. Përvoja e përbashkët në Akademinë e FBI-së krijoi marrëdhënie që vijuan gjatë edhe pas përfundimit të trajnimit. Këtij komuniteti profesionistësh i është bashkuar tashmë i diplomuari i parë nga BKH, krahas kolegëve të shumta nga policia dhe institucione të tjera.
Së shpejti programin do ta ndjekë edhe përfaqësuesi i dytë i BKH. Në Shqipëri kemi bërë përparim në hetimin dhe goditjen e krimit të organizuar. Bashkëpunimi me ndërkombëtarët ka pasur një rol të rëndësishëm në këtë proces. Nga hetimet tona kemi fituar njohuri në mënyrën se si organizohen grupet kriminale, si krijohen lidhjet përtej kufijve dhe se si fshehin dhe lëvizin përfitimet e tyre. Për SPAK, bashkëpunimi përfshin edhe përgjegjësinë për të kontribuuar në hetimet e partnerëve, me të njëjtin seriozitet që presim për kërkesat tona.”, tha Braho.
