Një operacion i gjerë ndërkombëtar po zhvillohet në Ballkanin Perëndimor me synim goditjen e rrjeteve të trafikut të kokainës që veprojnë nga Amerika Latine drejt Europës. Grupi kriminal i njohur si “çunat e Londrës” është në qendër të këtij aksioni, dhe dyshohet se kanë lidhje të forta në Shqipëri. Sipas njoftimit të Agjencisë Nacionale të Krimit (NCA), FBI-ja britanike ka formuar një grup hetimor speciale në bashkëpunim me agjencitë ligjzbatuese të vendeve të Ballkanit.
Qëllimi i operacionit është identifikimi dhe shkatërrimi i rrjeteve që kontrollojnë furnizimin e kokainës nga Amerika e Jugut deri në tregun europian. Shqipëria, Serbia, Mali i Zi dhe Kosova janë identifikuar si pika kyçe në rrugën ballkanike të drogës. Këto grupe supozohet se menaxhojnë transportin e drogës përmes porteve në Adriatik dhe Mesdhe, duke përdorur kompani fiktive për të fshehur ngarkesat me drogë.
Zëvendësdrejtoresha e NCA-së, Kate Appleby, theksoi se grupet kriminale nga Ballkani kanë një ndikim të madh në tregun global të kokainës dhe se ky operacion do të përqendrohet te individët dhe rrjetet që përbëjnë kërcënimin më të madh për sigurinë. Ky bashkëpunim i ri vjen në kuadër të samitit të Ballkanit Perëndimor në Londër, ku është theksuar nevoja për forcimin e luftës ndaj trafikut të drogës dhe pastrimit të parave.
Hetimet e deritanishme sugjerojnë se “çunat e Londrës” kanë ndërtuar një rrjet të sofistikuar të furnizimit dhe shpërndarjes së drogës, duke përfshirë kontakte në Amerikën Latine, Afrikën Perëndimore dhe Europën Qendrore. Autoritetet britanike dhe ato ballkanike paralajmërojnë se hetimet do të zgjerohen në javët në vijim dhe se janë të pritshme arrestime të rëndësishme në kuadër të këtij operacioni antidrogë. Kjo nismë përfaqëson një përpjekje të rëndësishme për të luftuar krimin e organizuar në rajon dhe për të siguruar një mjedis më të sigurt për qytetarët.
