Miroslav Klose ka uruar Lionel Messin pasi ylli argjentinas e kaloi zyrtarisht si golashënuesi më i mirë në historinë e Kupës së Botës.
Messi realizoi dy herë në fitoren 2-0 të Argjentinës ndaj Austrisë, duke e çuar numrin e golave në Botëror në 18. Më parë, ai kishte barazuar rekordin e Kloses me tripletën ndaj Algjerisë.
Legjenda gjermane, që e mbante rekordin me 16 gola që nga Botërori i vitit 2014, reagoi me shumë respekt për kapitenin e Argjentinës.
“Gjithmonë kam thënë se Messi nuk është një lojtar dosido. Për mua, Leo është futbollisti më i mirë i të gjitha kohërave. Urime, kampion!”, u shpreh Klose.
Ndeshja nuk nisi në mënyrën më të mirë për Messin, i cili humbi një penallti në minutën e nëntë. Megjithatë, ai reagoi në pjesën e parë, duke shënuar golin historik në minutën e 38-të, ndërsa në sekondat e fundit realizoi edhe golin e dytë personal.
Pas ndeshjes, Messi theksoi se më e rëndësishme se rekordi është fitorja e Argjentinës dhe kualifikimi për në fazën me eliminim. Me gjashtë pikë pas dy ndeshjeve, skuadra e Lionel Scalonit ka siguruar kalimin më tej dhe vijon mbrojtjen e titullit botëror.
